Ikaduwang Konsilyo Vaticano

An Ikaduwang Ekunumeko Konsilyo Vaticano, o Vaticano II, iyo an Ika-21 konsilyo ekunumeko nin Simbahan Katoliko. An konsilyo nagtipon sa Saint Peter's Basilica sa Siyudad Vaticano sa apat na pagtaragboan (o sesyon), lambang saro nag'aayaw nin 8 asin 12 semana, kan tigtarataan sa taon-taon poon 1962 sundo' 1965. An pagpangamdam para sa konsilyo nagtolong taon, poon tig-init kan 1959 abot tigtarataan nin 1962. An konsilyo nagbukas kan 11 Oktobre 1962 ni Juan XXIII (papa durante kan [preparasyon asin enot na sesyon), asin isinara kan 8 Desyembre 1965 ni Paulo VI (papa durante kan ultimong tolong sesyon, pakagadan ni Juan XXIII kan 3 Hunyo 1963).

Si Santo Papa Juan XXIII pinaapod an konsilyo ta sa pagtubod niya an Simbahan nangangaipo nin "pakikisabayan" (sa Italian: aggiornamento). Ngani mas makakonekta an simbahan sa layko sa atubangan kan orog na gayong sekularisadong kinaban, an ibang mga gawe asin katukdoan nin Simbahan dapat mapakarhay na gayo asin ihampang asin ipresentar sa mas masasabotan asin mas relebanteng paagi. Dakul na mga partisipante sa Konsilyo simpatitiko igdi, manta an iba mayong nahihiling na dapat sanglean asin nangungutiil nanggad. An suporta sa aggiornamento nangimbabaw duman sa mga nagbabatutilan para sa paghira, asin resulta kaini sampolo may anom (16) na magisterial na dokumento an napaluwas kan konsilyo na nagswestyon nin bagong pagpahayag kan doktrina asin praktis: an mahiwas na pagreporma kan liturhiya; an pinabagsik na teolohiya nin Simbahan, kan rebelasyon asin kan layko; asin man bagong pagdulok sa mga relasyon pag'ultan kan Simbahan asin kinaban, sa ekumenismo, sa bakong-Kristiyanong relihiyon, asin dangan man sa katalingkasan nin pagtubod.

An konsilyo may matagom na hugmak sa Simbahan, huli kaini ta halakbang sinakop an manlaen-laen na isyu maigot na pig'urulayan.